ཆོས་རྗེ་སྨར་པས་ལྷན་སྐྱེས་ལ་བསྟོད་པ།
ན་མོ་གུ་རུ། །
ཆོས་སྐུ་གདོད་ནས་སྐྱེ་འགག་མེད་ན་ཡང་། །
དག་སྣང་ཟུང་འཇུག་ལོངས་སྤྱོད་རྫོགས་པའི་སྐུ། །
ནམ་མཁའི་རང་བཞིན་བཅོམ་ལྡན་ཧེ་རུ་ཀ །
ལྷན་སྐྱེས་བདེ་ཆེན་སྐུ་ལ་ཕྱག་འཚལ་ལོ། །
སྐུ་མདོག་མི་འགྱུར་མཐིང་ནག་ཐུགས་ཀྱི་རིགས། །
ཞལ་གཅིག་ཕྱག་གཉིས་སྟག་གི་ཤམ་ཐབས་ཅན། །
ཤེས་རབ་རང་བཞིན་རྡོ་རྗེ་ཕག་མོ་དང་། །
གཉིས་མེད་ཞལ་སྦྱོར་ཧེ་རུ་ཀ་ལ་བསྟོད། །
དབུ་ཡི་གཙུག་ཏུ་ཡིད་བཞིན་ནོར་བུས་མཛེས། །
མ་རིག་མུན་སེལ་ཟླ་ཚེས་གཡོན་དུ་གསལ། །
ཡེ་ཤེས་ལྔ་ལྡན་བཅུ་ཕྱེད་ཐོད་འཕྲེང་ཅན། །
མི་བསྐྱོད་དབུ་བརྒྱན་ཧེ་རུ་ཀ་ལ་བསྟོད། །
སྒེགས་ཅིང་དཔའ་བ་མི་སྡུག་སྐུ་ཡི་ཉམས། །
རྒོད་ཅིང་དྲགས་ཤུལ་འཇིགས་རུང་གསུང་གི་ཉམས། །
སྙིང་རྗེ་རྔམ་དང་ཞི་བ་ཐུགས་ཀྱི་ཉམས། །
གར་གྱི་ཉམས་དགུ་ཧེ་རུ་ཀ་ལ་བསྟོད། །
ཆུ་སྐྱེས་ཉི་མའི་གདན་ལ་འགྱིང་ཞིང་མཛེས། །
བརྐྱང་བསྐུམ་ཞབས་ཀྱིས་འཇིགས་བྱེད་དུས་མཚན་མནན། །
མ་རུངས་འདུལ་ཕྱིར་ཐོད་པའི་འཕྲེང་བས་བརྒྱན། །
དྲེགས་པ་གསུམ་འདུལ་ཧེ་རུ་ཀ་ལ་བསྟོད། །
རྒྱན་དྲུག་ཕ་རོལ་ཕྱིན་དྲུག་རྫོགས་པའི་རྟགས། །
སྤྱན་གསུམ་བསྒྲད་པས་དུས་གསུམ་མཁྱེན་པའི་བརྡ། །
ཡེ་ཤེས་མེ་དཔུང་ནང་བཞུགས་འཇིགས་པའི་སྐུ། །
གཟི་བརྗིད་མཚུངས་མེད་ཧེ་རུ་ལ་བསྟོད། །
སྲིད་གསུམ་ཟིལ་གནོན་མདོག་དཀར་མཆིག་བ་གཙིགས། །
འཕྲིན་ལས་རྣམ་བཞི་འགྲོ་དོན་རྫོགས་མཛད་ཕྱིར། །
སྣ་ཚོགས་རྡོ་རྗེས་དབུ་བརྒྱན་འོད་ཟེར་འཕྲོས། །
དངོས་གྲུབ་འབྱུང་གནས་ཧེ་རུ་ཀ་ལ་བསྟོད། །
དཔའ་བོ་དཔའ་མོ་སུམ་བཅུ་རྩ་བདུན་དང་། །
ཉི་ཤུ་རྩ་བཞིའི་གནས་དང་ཉི་བའི་གནས། །
བཅོམ་ལྡན་སྐུ་ལ་དབྱེར་མེད་ལྷུན་གྲུབ་བཞུགས། །
མཁའ་འགྲོ་དབང་ཕྱུག་ཧེ་རུ་ཀ་ལ་བསྟོད། །
ནམ་མཁའ་དང་མཉམ་ཆོས་སྐུ་བསམ་མི་ཁྱབ། །
མཚན་དཔེ་རབ་བརྒྱན་ལོངས་སྐུ་བསམ་མི་ཁྱབ། །
ཆུ་ཟླ་དང་མཚུངས་སྤྲུལ་སྐུ་བསམ་མི་ཁྱབ། །
སྐུ་གསུམ་དབྱེར་མེད་ཧེ་རུ་ཀ་ལ་བསྟོད། །
ལྷ་མཆོག་ཁྱོད་ལ་བསྟོད་པའི་བསོད་ནམས་ཀྱིས། །
ཕྱི་ནང་བསྒྲུབ་པའི་བར་ཆད་ཞི་བ་དང་། །
སྐྱེ་ཤི་མེད་པ་རྡོ་རྗེའི་སྐུ་བརྙེས་ཤིང་། །
མ་འོངས་དུས་སུ་འགྲོ་བའི་འདྲེན་པར་ཤོག །
ཅེས་བཅོམ་ལྡན་འདས་ལྷན་སྐྱེས་ལ་རྣལ་འབྱོར་པ་ཤེས་རབ་ཡེ་ཤེས་ཀྱིས་དད་པའི་སྒོ་ནས་ཚིགས་སུ་བཅད་པ་བཅུས་བསྟོད་པ་རྫོགས་སོ། །