རྣམ་ཐར།

ཆོས་རྗེ་སྨར་པའི་རྣམ་ཐར་གཅེས་བསྡུས་བཞུགས་སོ།
 

ཆོས་རྗེ་སྨར་པ་ཤེས་རབ་ཡེ་ཤེས་ནི་ཕྱི་ལོ་༡༡༣༥་ལོ་སྨར་ཁམས་རུ་ཤོད་ལ་ཡབ་ཀླུ་ཡི་གཙུག་དང་ཡུམ་བདེ་དགའ་མ་གཉིས་ལས་སྐུ་འཁྲུངས།  བླ་མ་དགའ་བློས་ཀུན་དགའ་དཔལ་ཞེས་མཚན་གསོལ།  དགུང་ལོ་བཅོ་ལྔ་ལ་བླ་མ་ཨ་སེང་དང་བླ་མ་དགའ་བློ་ལས་མདོ་སྔགས་ཀྱི་ཆོས་མང་དུ་གསན། དགུང་ལོ་ཉེར་གཅིག་ལ་སྒོམ་རྒྱ་བ་ཤེས་རབ་རྒྱལ་མཚན་དང་ཤེས་རབ་གྲགས་པ་སོགས་ལས་རབ་ཏུ་བྱུང་བས་མཚན་ཤེས་རབ་ཡེ་ཤེས་གསོལ།  ལོ་དེར་གསང་ཕུ་ནེའུ་ཐང་ལ་ཕེབས་ནས་དགེ་བཤེས་བྱ་འདུ་འཛིན་པ། 


ཕྱྭ་བ་ཆོས་སེང་།  གཙང་ནག་པ་སོགས་ལས་བསྙེན་པར་རྫོགས།  བྱ་འདུ་འཛིན་པ་བརྩོན་འགྲུས་འབར་ལས་འདུལ་བའི་ཆོས་བསྐོར། ཕྱྭ་བ་དང་གཙང་ནག་པ་ལས་དབུ་ཕར་ཚད་གསུམ་སོགས་ལ་ཐོས་བསམ་བྱས་པས་མཁས་པ་ཆེན་པོར་གྱུར།  དྭགས་པོ་སྒོམ་ཚུལ།  བྷེ་རོ།  ལྕང་ལུང་པ།  ཡ་གད་པ།  དོན་སྟེང་པ།  བྱ་འཆད་ཀ་བ།  རྒྱལ་བ་ཁོ་སྟོན།  བླ་མ་རྔོག་གཞུང་།  བླ་མ་ཞུང་པ་སོགས་ལས་མདོ་སྔགས་ཀྱི་ཆོས་བསྐོར་མང་པོ་གསན།  རྡོ་རྗེ་རྒྱལ་པོ་ལས་བཀའ་བརྒྱུད་ཀྱི་ཆོས་བསྐོར་དང་ལམ་འབྲས་སོགས་གསན་ནས་ལོ་གསུམ་སྒོམ་པས་འཁོར་འདས་ཀྱི་ཤན་ཕྲག་ཕྱེད་ཅིང་དབུ་མའི་ལྟ་བ་རྟོགས། གཏུམ་མོ་བདེ་དྲོད་རྒྱས་པ་སོགས་ཉམས་རྟོགས་སྐྱེས།  ལོ་ལྔའི་རྗེས་སླར་སྨར་ཁམས་སུ་ཕེབས་ཁར་ཕག་གྲུ་པས་དབུ་ཞྭ་སྒྲོན་ནས་བཀྲ་ཤིས་བསྔོ་སྨོན་མཛད། 
 ཕྱི་ལོ་༡༡༦༧་མེ་ཕག་ལོ་སྨར་ཁམས་རི་ཤོད་འདམ་སྟེང་ལ་བཀྲ་ཤིས་དགོན་པ་བཏབ།  དགེ་འདུན་གཉིས་སྟོང་ལྷག་ལ་བཤད་སྒྲུབ་ཀྱི་སྲོལ་བཏོད།  ཡི་དམ་ལྷས་ཞལ་གཟིགས་དང་ཆོས་སྐྱོང་བྲན་དུ་འཁོར་ཞིང་།  དགུ་ལོ་༦༩་སོན་པའི་ཕྱི་ལོ་༡༢༠༣་ སྟོན་ཟླ་འབྲིང་པོའི་ཚེས་བཅུ་ལ་སླར་སྐྱེས་སྤྲུལ་མེད་པའི་ལུང་བསྟན་ནས་བདེ་བར་གཤེགས།  དུས་དེར་ཐུགས་ཀ་ནས་འཇའ་འོད་ནང་དུ་སེམས་དཔའ་སྔོན་པོའི་ཆ་ལུགས་ཅན་ནམ་མཁར་བྱོན།  ཐུགས་སྲས་འགྲོ་མགོན་རིན་ཆེན། ཡེ་ཤེས་རྒྱལ་མཚན། གྲུབ་ཆེན་གཤའ་པ། ཆོས་ཀྱི་ཡེ་ཤེས། ཆམ་ཕུར་སྒོམ་ཆེན།  བྱང་ཆུབ་འབུམ།   བླ་མ་རྣམ་གྲོལ། བླ་མ་ལྷུམ་སྒོམ། ཆོས་རྡོར། གཞོན་ནུ་དབང་ཕྱུག  རྩང་པ་གཏེར་སྟོན། སྲོ་ཡོན་སྟོན། མེ་མཆོད།    རྣལ་འབྱོར་ཨ་འབུམ།  ཡོན་བཙུན་བྲག་ཏོག  དཔོན་ཚུལ་ཁྲིམས་སོགས་མང་དུ་བྱུང་། གསུང་གི་སྙིང་པོ་ཕྱག་ཆེན་མན་ངག་རྒྱ་མཚོ། རི་ཆོས་ཡོན་ཏན་ཀུན་འབྱུང་། ཉམས་མགུར་སུམ་ཅུ་སོ་ལྔ།  སྒོམ་ཆེན་ཁག་ལ་གདམས་སྤྲིངས་ཉེ་དྲུག དང་མཆེད་གྲོགས་ལ་སྤྲིངས་ཡིག་གསུམ།  ཕག་གྲུ་ལ་བསྟོད་པ་དགུ  སྐྱབས་འགྲོ  དགོན་པའི་ཁྱད་ཆོས། བྱ་རོག་བསྟོད་པ། བདེ་མཆོག་བསྟོད་པ། སྨོན་ལམ། བཀའ་བརྒྱུད་ལ་གསོལ་འདེབས་བཞི། བཀྲ་ཤིས་གསུམ་བཅས་ཁྱོན་༨༥་ད་ལྟ་བཞུགས་ཡོད།   རྗེ་འདི་ལ་རིན་ཆེན་བློ་གྲོས། ཤེས་རབ་སེངྒེ་ཟེར་བ་ནི་ཁུངས་མེད་ཡིག་ནོར་ཡིན།