ཤོ་དགོན་གྱི་དགེ་འདུན་རྣམས་ལ་སྤྲིང་བ།

ཤོ་དགོན་གྱི་དགེ་འདུན་རྣམས་ལ་སྤྲིང་པ།

ཨོྃ་སྭ་སྟི་སིདྷཾ། བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །


བསོད་ནམས་ཆུ་གཏེར་ཡོན་ཏན་པདྨོའི་ཚལ། །

ཕན་བདེའི་དྲི་བཟང་དགེ་འདུན་བུང་བས་བསྟེན། །

ཏིང་འཛིན་སྦྲང་རྩིས་སྐྱེ་དགུའི་གདུང་སེལ་བ། །

འགྲོ་བའི་བླ་མ་རྟག་ཏུ་རྒྱལ་གྱུར་ཅིག །

 
དམ་པ་དམ་པའི་སྐྱེ་བོ་འདུ་བའི་གནས། །

བདེ་གཤེགས་བདེ་བར་གཤེགས་པའི་བསྟན་འཛིན་པ། །

དབེན་གནས་དབེན་ལ་དགའ་བ་འདུ་བའི་གཞི། །

དགོན་པའི་དམ་པ་ཤོ་དགོན་ཞེས་སུ་གྲགས། །

 
དེར་གནས་དགེ་འདུན་རྣམས་ལ་དོན་འདི་སྤྲིངས།

སྡོམ་བརྩོན་དམ་པ་ཏིང་འཛིན་མཆོག་བརྙེས་པ། །

ཡང་དག་ལམ་སྟོན་འགྲོ་ལ་བུ་བཞིན་བརྩེ། །

བསྟན་པའི་མཛོད་འཛིན་བླ་མ་དམ་པ་དེ། །

 
ཞི་བར་གཤེགས་ཞེས་བདག་གིས་རིང་ནས་ཁུམས། །

དེ་ལ་གཤེགས་དང་བཞུགས་པ་ཡོངས་མི་མདའ། །

གཤེགས་དང་བཞུགས་པ་འཇིག་རྟེན་བླུན་པོས་བཏགས། །

དམ་པའི་དོན་དུ་ཆོས་རྣམས་ཉེ་བར་ཞི། །

 
བརྩོན་ལྡན་ཁྱེད་ཀྱིས་དོན་འདི་ལེགས་མཁྱེན་མོད། །

འོན་ཀྱང་སྙིགས་དུས་བསོད་ནམས་ཞན་པ་དང་། །

རྩོད་པའི་དུས་ཀྱིས་འགྲོ་བ་བླུན་པོ་ན། །

དམ་པའི་དོན་ལ་དཔྱོད་པ་ཞན་པའི་ཕྱིར། །

 
འདས་པ་ཡིན་ཞེས་གདུང་བ་མི་བཟད་སྐྱེ། །

འཁྲུལ་པའི་སྣང་ངོར་བདེ་གཤེགས་བསྟན་པ་ཡང་། །

སྟོན་ཀའི་ཆར་བཞིན་ཀུན་ནས་འབྲི་བ་མཐོང་། །

སྐྱེ་བོ་དམ་པའི་འབྲས་བུ་ཕལ་ཆེར་ཡང་། །

 
དུས་ཀྱི་ཤུགས་ཀྱིས་རྣམ་པར་ལྟུང་བར་སྣང་། །

དེ་ཡི་སླད་དུ་དགེ་འདུན་རྣམས། །

དངོས་པོའི་ཆོས་ཉིད་མཁྱེན་པས་ན། །

རྣམ་པ་ཀུན་ཏུ་ཐུགས་གཏོད་ཅེས། །

རིང་ནས་གནས་པ་བདག་གསོལ་འདེབས། །

དཔལ་ལྡན་ས་སྐྱ་པཎྜི་ཏས་ཤར་ཕྱོགས་ཀྱི་སའི་ཆ་གནམ་འཕང་མཐོ་ཞིང་རྒྱ་ཡངས་ལ་ཡིད་དུ་འོང་བ།  རི་བོ་ཆེན་པོ་རིན་པོ་ཆེ་འབར་བ་ལྟ་བུའི་ངོགས།  རྩི་ཤིང་དང་ནགས་ཚལ་ཕུན་སུམ་ཚོགས་པ།  མཛེས་པའི་མེ་ཏོག་སྣ་ཚོགས་དང་།  སྒྲ་སྙན་པའི་བྱ་དུ་མས་གང་བ། གྲུབ་པ་ཐོབ་པའི་སྐྱེས་བུ་རྣམས་ཀྱིས་བསྟེན་པའི་གནས།  དཔལ་གྱི་ཤོ་དགོན་ན་བཞུགས་པའི་རིན་ཆེན་གདན་ས་པས་དབུ་མཛད་དགེ་འདུན་རྣམས་ཀྱི་ཕྱག་ཏུ་སྤྲིང་བ།  འགྲོ་བ་ཐམས་ཅད་ལ་བུ་གཅིག་པ་ལྟར་བརྩེ་བའི་ངང་ཚུལ་ཅན་བླ་མ་དམ་པ་དེ་ལ་འདས་གྲོངས་མི་མངའ་ཡང་།  སྐྱེ་བོ་རྟག་འཛིན་ཅན་རྣམས་དྲང་བའི་ཕྱིར།  བདེ་བ་ནས་བདེ་བར་གཤེགས་པ་སྟེ  སངས་རྒྱས་ཀྱི་བསྟན་པ་ཉམས་དམས་ཤིང་།  སེམས་ཅན་རྣམས་མགོན་དང་བྲལ་བ་ཡིན་མོད་ཀྱི།  འོན་ཀྱང་ཡང་དག་པའི་དོན་ལ་དགོངས་ནས་ཐུགས་ཁྲལ་མི་མཛད་པར་ཞུ།

རྫསདང་བཀུར་སྟི་ལ་སོགས་པའང་། །

མཆོད་པའི་ཁྱད་པར་ཡིན་མོད་ཀྱང་། །

ཡང་དག་བླ་མ་དམ་པ་ལ། །

བསྒྲུབ་པའི་མཆོད་པ་དེ་བས་ལྷག །
 

དེ་སླད་ཚུལ་ཁྲིམས་ཏིང་འཛིན་དང་། །

རྣམ་གྲོལ་ཡེ་ཤེས་འཕེལ་བའི་ཕྱིར། །

སྡོམ་བརྩོན་དགེ་འདུན་ཁྱེད་རྣམས་ཀྱིས། །

 སངས་རྒྱས་བསྟན་པ་རྒྱས་པ་དང་། །
 

བླ་མ་དམ་པ་མཉེས་བྱའི་ཕྱིར། །

ཡང་དག་རྟུལ་ཞུགས་བརྟན་པ་ཡིས། །

རྣམ་པ་ཀུན་དུ་བརྩོན་མཛད་ན། །

 བླ་མ་ཐུབ་པ་མཉེས་པར་འགྱུར། །
 

སྤྲིང་ཡིག་ཚ་ཟེར་བྱེད་པའི་དཀྱིལ་འཁོར་གྱིས། །

འགྲོ་བའི་སྡུག་བསྔལ་མུན་པའི་ཚོགས་བསལ་ཏེ། །

དགེ་འདུན་པདྨོའི་ཚོགས་རྣམས་རྒྱས་བྱེད་ཅིང་། །

 བདེ་གཤེགས་བསྟན་པ་ཡུན་རིང་གསལ་གྱུར་ཅིག །
 

བྱང་ཆུབ་སྙིང་པོ་དམ་པས་བྱང་ཆུབ་པ། །

མཉམ་མེད་དེ་ནི་ཆོས་ཀྱི་དགའ་སྟོན་གྱིད། །

ལོག་རྟོགས་མགོན་མེད་ཕོངས་པའི་སྐྱབས་གྱུར་པ། །

 ཀུན་མཁྱེན་འགྲོ་མགོན་དེ་ཡི་ཞབས་ལ་འདུད། །
 

ཡོན་ཏན་དཔག་མེད་ཆབ་ཀྱིས་ལེགས་གང་ཞིང་། །

ལུང་རིགས་མན་ངག་རིན་ཆེན་གཏེར་གྱིས་ཕྱུག །

ཡིད་བཞིན་མཚོ་འདྲ་དཔལ་ལྡན་ས་སྐྱ་ནས། །

 མཁས་པ་རྣམས་ལས་སྡེ་སྣོད་མང་ཐོས་ཤིང་། །
 

བླང་དོར་ལེགས་པར་ཕྱེད་པའི་ཤེས་རབ་ལྡན། །

ཚུལ་ཁྲིམས་ལེགས་སྲུང་ལྟ་བ་དག་པ་ཅན། །

སྡེ་སྣོད་འཛིན་པ་དེ་ཡི་སྤྲིང་ཡིག་འདི། །

བྱམས་པའི་ཐུགས་དགོངས་ཕན་བདེའི་འཕྲིན་ལས་ཅན། །

ཤར་ཕྱོགས་སྨར་ཁམས་ཞིང་ན་ལེགས་བཞུགས་པ། །

སྡེ་དགོན་ཡོན་མཆོད་རྣམས་ཀྱི་ཕྱག་ཏུ་ཕུལ། །

ཞེས་འཇམ་མགོན་ས་སྐྱ་པཎ་ཆེན་གྱིས་སྨར་ཚང་བཀའ་བརྒྱུད་ཀྱི་བསྟན་པའི་སྲོལ་འཛིན་འགྲོ་མགོན་རིན་ཆེན་མཆོག་སྐུ་འཚོ་བཞུགས་སྐབས་དང་སྐུ་གཤེགས་པའི་རྗེས་སུ་ཕུལ་བའི་འཕྲིན་ཡིག་ཁག་གཉིས་པོ་འདི་བོད་ལ་ཐོག་མ་དེབ་བསྐྲུན་བྱས་པའི་ས་པཎ་གསུང་འབུམ་རྙིང་མ་ཁག་ལ་མཇལ་རྒྱུ་ཡོད་ཀྱང་ཕྱིས་སུ་དེབ་གསར་འགའ་ཞིག་གི་ནང་དུ་འཕྲིན་ཡིག་གཉིས་ཀ་མེད་པར་བཟོས་འདུག་པས་རྒྱུ་མཚན་ཅི་ཡིན་དཔྱད་ཞིབ་དགོས་པའི་གནས་སུ་གྱུར་རོ། །



 

༄༅།། སྨར་ཚང་བསྟན་རྒྱས་སྨོན་ལམ།

ཨོཾ་སྭ་སྟི། །བསྟན་པ་གངས་རིར་སྲི་ཞུའི་ཆུ་རྒྱུན་གྱིས། །ཚོགས་གཉིས་རྨད་བྱུང་ཡོན་ཏན་པདྨོ་ལ། །འཕྲིན་ལས་འདབ་རྒྱས་ལམ་བཟང་འཛུམ་བཞད་ནས། །སྐལ་བཟང་བདེ་སྟོང་སྦྲང་རྩིར་རོལ་གྱུར་ཅིག །གཟུང་འཛིན་རྦ་རླབས་བྱིང་རྒོད་འཕྱུར་བ་ཀུན། །གཡོ་མེད་སེམས་མཆོག་ཆུ་བོ་གཅིག་བསྒྲིལ་ཏེ། །ཞི་ལྷག་རྒྱ་མཚོ་ངང་ཚུལ་བསྟེན་བྱེད་ནས། །སྐུ་བཞི་བརྙེས་མཛད་སྨར་ཚང་རྒྱས་གྱུར་ཅིག །མཁས་མང་རྒྱ་མཚོ་རྟོགས་ལྡན་ངང་པའི་ཁྱུ། །སྒོམ་ལྔའི་སྒྲོ་རྒྱས་སྟོང་ཉིད་རླུང་ཤུགས་ཀྱི། །ཡེ་ཤེས་ལྔ་ཡི་མཁའ་ལ་ལྡིང་བྱེད་པའི། །སྨར་ཚང་བཤད་སྒྲུབ་འཛམ་གླིང་ཁྱབ་གྱུར་ཅིག །ཤོ་ཙོམ་ཉི་ཟླ་མུན་སེལ་ཟུང་གཅིག་སྲོལ། །དུས་ཀྱི་དབང་གིས་ནུབ་ཏུ་གཤེགས་གྱུར་ཀྱང་། །སླར་གསོ་འདུན་སྡེ་སྐྱ་རེངས་མྱུར་ཤར་ནས། །མཁས་གྲུབ་ཉིན་བྱེད་རིང་ལུགས་གསལ་གྱུར་ཅིག །ཡེ་ཤེས་སྤྱན་ལྡན་སྨར་ཚང་ཆོས་སྲུང་ཀུན། །གཡེང་དུས་ལས་བཞེངས་བསྟན་དགྲ་ཚར་གཅོད་ནས། །བསྟན་འཛིན་སྦྱིན་བདག་མངའ་ཐང་མྱུར་རྒྱས་ཏེ། །བཀྲ་ཤིས་སྙན་གྲགས་སྲིད་གསུམ་ཁྱབ་པར་མཛོད། ཅེས་སྨར་ཚང་བསྟན་རྒྱས་སྨོན་ལམ་འདི་གངས་རི་ཀརྨ་ཆོས་ཀྱི་རྒྱལ་མཚན་གྱིས་ཕྱི་ལོ་༢༠༠༩་ཕྱི་ཟླ་༦་ཚེས་༢༣་དབྱིན་ལེན་གྱི་རྦུ་རེ་ཐིན་དུ་བྲིས་སོ།