ཤོ་དགོན་པའི་འགྲོ་མགོན་རིན་ཆེན་ལ་སྤྲིངས་པ།
ཨོཾ་སྭ་སྟི་སིངདྷཾ། བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །
འདུས་པའི་གཙུག་ན་སྟོང་ཉིད་སེངྒེའི་སྒྲ། །
རྡུལ་བྲལ་དཔག་ཡས་འཇམ་པའི་ཡན་ལག་གིས། །
སྒྲ་དབྱངས་སྒྲོགས་པ་དེ་ལ་ཕྱག་འཚལ་ལོ། །
གྲུབ་པ་མཆོག་བརྙེས་དུ་མ་བཞུགས་པའི་གཞི།
།
དཔལ་ལྡན་ས་སྐྱའི་དགོན་པ་ལེགས་གནས་པ། །
སྡེ་སྣོད་འཛིན་པ་དེ་ཡི་སྤྲིངས་ཡིག་འདི། །
རྟོགས་ལྡན་འཕགས་པའི་ཚོགས་ཀྱི་རབ་གང་བ།
།
གྲུབ་པའི་གནས་མཆོག་ཤོ་དགོན་དབེན་གནས་སུ།
།
བཞུགས་པའི་འགྲོ་མགོན་རིན་ཆེན་ཕྱག་ཏུ་འབུལ།
།
སླད་མ་ངེད་ལ་ཧོར་གྱི་རྒྱལ་པོས་བླ་མཆོད་ལ་འོང་དགོས་བྱ་བའི་གདན་འདྲེན་ནན་ཅན་ཡང་ཡང་བྱུང་བས་ད་ལོ་འགྲོ་བ་ལགས།
ཁྱེད་ཀྱིས་ཀྱང་རྒྱལ་པོའི་བླ་མཆོད་བྱ་རྒྱུ་དང། མི་གོ་ཆོད་འགའ་འདབ་ནོར་དང་ངེད་ཀྱི་ཟླ་ལ་བཏང་ནས་རྒྱལ་པོའི་གསེར་ཡིག་དང་འཇམ་ས་ཞུས་ན་ངོ་ལྟ་བརྟན་པ་ཡིན་པས་ཐུགས་ལ་འཐད་ན་ངས་རོགས་ལྡན་གང་དགོས་བྱེད་པ་ལགས།
ངེད་གར་ཡོད་ཀྱི་སྡོན་ལ་མི་ཐོངས།
ཁྱེད་ཀྱི་སློབ་མ་སྟོན་ཚུལ་ལ་སོགས་པ་ཀུན་ཡང་ཡོན་ཏན་ཆེ་བར་ཡོད།
ཁྱེད་ལ་ཡང་མོས་གུས་དང་རེ་གཉིས་ཀ་ཆེ་བར་གདའ། ཁྱེད་ཀྱི་བསྟན་པའི་སྒོར་ཞུགས་ཚད་རྣམས་ལ་སྐུ་གཅེས་པ་ཉ་དང་ཚེས་བརྒྱད་བྱུང་ངོ་ཅོག་ལ་རྣམ་རྒྱལ་སྟོང་མཆོད་མང་བ་རེ་མཛད་པར་ཞུ།
ཡིག་རྟེན་དུ་ཡྰ་ཙེ་རྒྱལ་པོས་ཁོང་རང་གི་ཐུགས་དམ་དུ་བཞེངས་ནས་ངེད་ལ་ཕུལ་བའི་གསེར་སྡུད་ཡིག་ཤོག་ཁྱད་པར་དུ་འཕགས་ཤིང་།
གླེགས་ཤིང་གི་རྒྱབ་རྐོས་ལ་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱོགས་བཅུའི་སངས་རྒྱས་ཀྱིས་བསྐོར་བ་དང་། ལྡུམ་རྫིངས་དང་།
པ་ཏྲ་ལ་སོགས་པ་བཟོ་གནས་ཁྱད་པར་འཕགས་པ་དུ་མ་དང་ལྡན་པ། ཙོའུ་ཟི་དམར་པོ་དང་།
བོའུ་རས་དཀར་པོའི་ན་བཟའ་ཅན་གནག་འབུམ་གཅིག་དང་ངོ་མཉམ་ཟེར་བ་ཞིག་ཐུགས་དམ་དུ་འབུལ། གཞན་དུ་མི་གཏང་བར་ཞུ། རས་དར་ཚོན་མ་ཡ་བ་ལེགས་པ་ཞིག་དང་།
ཀ་རའི་གླང་པོ་ཆེ་ཞིག་འབུལ་ཞིང་མཆིས།
དུས་གསུམ་རྒྱལ་བ་སྲས་བཅས་བསྐྱེད་པའི་ཡུལ།
།
བདག་འཛིན་བུད་ཤིང་སྲེག་པའི་ཡེ་ཤེས་མེ།
།
མ་རིག་མུན་པ་གསལ་བྱེད་རིན་ཆེན་སྒྲོན།
།
ཟབ་མོའི་དོན་སྟོན་གསུང་རབ་དྲི་མ་མེད།
།
སྡུག་བསྔལ་ནད་ཀུན་སེལ་བྱེད་སྨན་གྱི་མཆོག
།
ཞལ་གསུང་ཕ་རོལ་ཕྱིན་གཞུང་སུམ་བརྒྱ་པ།
།
མཐིང་ཤོག་གཞི་ལ་གསེར་ཡིག་ཁྱད་པར་འཕགས།
།
གླེགས་ཤིང་ངོས་ལ་ཕྱོགས་བཅུའི་སངས་རྒྱས་སྐུ།
།
འཛམ་བུའི་གསེར་ལས་བཟོ་གནས་དུ་མས་བརྒྱན།
།
དབུས་གཙང་མཐིལ་ན་ཁྱད་པར་འཕགས་པ་འདི། །
དགེ་འདུན་རྒྱ་མཚོ་འདུ་བའི་ཕོ་བྲང་དུ།
།
མི་མཆོག་ཁྱེད་ལ་མཆོད་པའི་རྟེན་དུ་འབུལ།
།
ཀ་ཤིའི་རས་དང་ཀ་རའི་གླང་པོ་མཆོག །
དངོས་པོ་ཤིན་ཏུ་ཕྲ་བར་གྱུར་ན་ཡང་། །
དགའ་བའི་ཡིད་ཀྱིས་རིང་ནས་བསྐུར་བ་འདི།
།
མོས་པའི་སྟོབས་ཀྱིས་ཕྱག་ཏུ་ཕྱིན་ནས་ཀྱང་།
།
དྭངས་ཤིང་དགྱེས་པའི་ཐུགས་ཀྱིས་བཞེས་ནས་སུ།
།
གཞན་ཕན་ཐུགས་ལས་ཆུང་ལ་མི་གཞོལ་ཞུ། །
རྟོགས་པ་ཟླ་མཛེས་ཡོན་ཏན་དཀྱིལ་འཁོར་རྒྱས།
།
ཕྲིན་ལས་བསིལ་འོད་ཉོན་མོངས་གདུང་བ་སེལ།
།
སློབ་མ་ཀུནྜའི་ཚལ་རབ་རྒྱས་མཛད་པ། །
སྐྱེ་མཆོག་རི་བོང་འཛིན་པ་རྒྱལ་གྱུར་ཅིག
།
དགེ་ཞིང་བཀྲ་ཤིས་པར་གྱུར་ཅིག
།ཅེས་འཇམ་མགོན་བླ་མ་ས་སྐྱ་པཎྜི་ཏ་མཆོག་གིས་སྨར་ཚང་བཀའ་བརྒྱུད་ཀྱི་བསྟན་པའི་ཉིན་བྱེད་འགྲོ་མགོན་རིན་ཆེན་མཆོག་ལ་ཕུལ་བའི་འཕྲིན་ཡིག་ལ་བལྟ་ན་དུས་རབ་དེར་སྨར་ཁམས་གསེར་མོ་ལྗོངས་ཀྱི་ཕྱིའི་སྣོད་ཀྱི་བཀོད་པ་དང་ནང་དུ་བཤད་སྒྲུབ་ཀྱི་བསྟན་པའི་ཡུལ་ལུང་མཛེས་པར་བྱས་པའི་ཁྱད་ཆོས་རྣམས་ཞིབ་ཕྲ་གསལ་བར་བྱས་ཡོད་ལ།
ལྷག་པར་དུ་ཆོས་ཀྱི་རྒྱལ་པོ་སྨར་པ་རིན་པོ་ཆེའི་ཐུགས་སྲས་འགྲོ་མགོན་རིན་ཆེན་གྱི་མཁས་པའི་ཡོན་ཏན་དང་གྲུབ་པའི་ཉམས་རྟོགས་ལས་འཁྲུངས་པའི་མཁས་གྲུབ་གཉིས་ལྡན་གྱི་སྐྱེ་བུ་གནམ་གྱིས་ས་བཀབ་པ་ལྟ་བུ་བྱོན་པའི་སྒྲུབ་བྱེད་ཆེས་གསལ་བར་མངོན་འདུག་པས་ཟུར་གནས་སྐྱེ་བོ་རྣམས་ཀྱིས་གཟིགས་པར་འཚལ།
།