ལྷ་བཅས་སྲིད་ཞི་གཙུག་ཏུ་བཀུར་བའི་གཞི། །
མར་གྱུར་འགྲོ་བ་ཀུན་གྱི་སྐྱབས་གཅིག་པུ། །
སྟོན་མཆོག་ཟས་ཙང་སྲས་ཀྱི་སྲོལ་བཏོད་པའི། །
རྟེན་འབྱུང་ལྟ་བའི་རྒྱུད་འཛིན་ཀུན་ལ་འདུད། །
སྣང་བ་སྣ་ཚོགས་འཆར་བའི་འཇིག་རྟེན་འདི། །
སྒྲོ་བཏགས་བདེན་པ་སྣང་བའི་འཁྲུལ་བ་ཀུན། །
ཆོས་ཉིད་ནམ་མཁའི་དབྱིངས་སུ་ཡལ་གྱུར་ཅིག །
འཇིག་རྟེན་སྣང་བ་རྨི་ལམ་སྒྱུ་མ་འདི། །
བདེན་སྡུག་དུ་མ་སྐྱེས་པའི་གཞི་ཡིན་པས། །
ཆགས་སྡང་རྨོངས་གསུམ་འཆར་བའི་ཚོར་བ་ལ། །
ཞེན་པ་སྤོང་ཚུལ་ཤེས་སམ་རྒྱལ་ཁམས་པ། །
མཐོ་སར་བསྡད་ན་ཆེན་པོས་ཕྲག་དོགས་བྱེད། །
བར་མར་བསྡད་ན་མི་རྣམས་འགྲན་སེམས་སྐྱེ། །
དམའ་སར་བསྡད་ན་ཀུན་གྱིས་སྨད་ར་བྱེད། །
འཇིག་རྟེན་སྤྱོད་པ་ཤེས་སམ་རྒྱལ་ཁམས་པ། །
བྲེལ་འཚུབ་ཆེན་པོས་འབད་པར་དུ་མ་ཡིས། །
གཞན་ངོ་སྲུང་ན་མགུ་དུས་མི་སྲིད་པས། །
རང་ངོ་ཆོས་དང་མཐུན་པའི་བྱ་བ་ཀུན། །
སྲོག་ལས་ལྷག་པ་ཤེས་སམ་རྒྱལ་ཁམས་པ། །
དྲང་བདེན་སྤྱོད་ན་ཕལ་ཆེར་དགྲ་རུ་ལངས། །
ཟོག་རྫུན་སྨྲ་ན་རྣམ་སྨིན་རང་ལ་འབྱུང་། །
གཉིས་ཀ་སྤྱོད་ན་རང་ཡང་རྨོངས་གྱུར་པས།།
ཐབས་མཁས་བྱ་བ་ཤེས་སམ་རྒྱལ་ཁམས་པ། །
ཀུན་ལ་བསྟུན་ན་ཆོས་ལས་འཇིག་རྟེན་མང་། །
འབྲེལ་ཐག་བཅད་ན་མི་ཡི་གྲས་སུ་ཕུད། །
མཉམ་དུ་འདྲེས་ན་བླང་དོར་གོ་ལྡོག་བྱེད། །
མི་ལ་མཐུན་འཇུག་ཤེས་སམ་རྒྱལ་ཁམས་པ། །
ཧྲུལ་གོས་གྱོན་ན་ཀུན་གྱིས་མཐོང་ཆུང་བྱས། །
བཟང་གོས་གྱོན་ན་རྫིག་པོ་བྱེད་པར་མཐོང་། །
འབྲིང་པོ་གྱོན་ན་སློབ་མ་འདུལ་བར་གླེང་། །
མི་ཡི་འདོད་ཚུལ་ཤེས་སམ་རྒྱལ་ཁམས་པ། །
ཚིག་རྩུབ་སྨྲས་ན་ཕ་ཡང་དགྲ་རུ་འགྱུར། །
འཇམ་པོ་སྨྲས་ན་ཀུན་གྱིས་མནར་གཅོད་བྱེད། །
ཁ་རོག་བསྡད་ན་བླུན་པོའི་གྲས་སུ་འཇོག །
འཇིག་རྟེན་བྱ་བ་ཤེས་སམ་རྒྱལ་ཁམས་པ། །
སློབ་ཚོགས་མང་ན་འདུ་འཛིན་བྱེད་པོ་ཟེར་། །
གཅིག་པུར་བསྡད་ན་འབྲེལ་མེད་ཁེ་རྐྱང་རྩིས། །
ཕན་སེམས་བྱས་ན་དོགས་པ་སྣ་ཚོགས་སྐྱེས། །
མི་ཡི་བསམ་ཚུལ་ཤེས་སམ་རྒྱལ་ཁམས་པ། །
དྲང་པོའི་ལམ་སྟོན་འཁོན་པའི་རྒྱུ་རུ་གྱུར། །
ཐབས་མཁས་བྱ་བ་གཡོ་སྒྱུར་ཉིད་གོ་བའི།
རྨོངས་པའི་འདམ་དུ་ལྷུང་བའི་སྐྱེ་བོ་ལ། །
སྙིང་རྗེ་བསྐྱེད་ཚུལ་ཤེས་སམ་རྒྱལ་ཁམས་པ། །
མཆོད་ཡོན་འབྲེལ་བ་མང་ན་འཆིང་བའི་རྒྱུ། །
གཅིག་ལ་གཅིག་རྟེན་སྡུག་གི་ཚོར་བ་ནི། །
འཆད་པའི་དུས་ཤིག་ནམ་ཡང་མི་སྲིད་པས། །
ཞེན་པ་སྤོང་ཚུལ་ཤེས་སམ་རྒྱལ་ཁམས་པ། །
སྒྲུབ་དཀའ་འཇིག་སླ་འཁོར་བའི་བྱ་བ་འདི། །
ཇི་སྲིད་འབད་ཀྱང་འཁྲུལ་བའི་ཡོ་ལང་དུ། །
འཇའ་ཚོན་བཞིན་དུ་ཡལ་བའི་ཆོས་ཡིན་པས། །
མི་རྟག་སྒྱུ་མ་ཤེས་སམ་རྒྱལ་ཁམས་པ། །
ཉམ་ཆུང་བྱས་ན་བླུན་པོས་ཐུབ་ཚོད་གཏོང་། །
ཡོན་ཏན་མངོན་ན་བླུན་པོས་ལྷག་པར་སྡང་ །
འཇིག་རྟེན་བླུན་པོ་མགུ་དུས་མི་སྲིད་པས། །
རི་ཁྲོད་ཡིད་ལ་དྲན་ནམ་རྒྱལ་ཁམས་པ། །།
ཆོས་དང་འཇིག་རྟེན་སྤྱོད་ལམ་ཅི་བྱས་ཀྱང་། །
རྒྱུ་ནོར་དབང་ཤུགས་ལམ་དུ་མི་ཤོར་བར། །
རྣམ་ཀུན་དྲང་པོའི་ལྟ་སྤྱོད་གཙང་མ་ནི། །
སྲོག་ལས་གཅེས་པ་ཤེས་སམ་རྒྱལ་ཁམས་པ། །
བཤད་སྒྲུབ་བསྟན་པ་སྤེལ་བའི་དོན་གྱི་ཕྱིར། །
སྐྱེ་བོ་འབུམ་གྱིས་སྡང་སེམས་བྱས་ན་ཡང་། །
སྲོག་ལ་ཐུག་ཀྱང་དམ་བཅའ་མི་འདོར་བར། །
འབད་འབུངས་བྱ་བ་ཤེས་སམ་རྒྱལ་ཁམས་པ། །
མདུན་དུ་འཕྲད་དུས་ངོ་བསྟོད་བསྤྲེལ་ལེན་བྱས། །
རྒྱབ་དུ་འགྲོ་ནས་འཁང་ར་འབའ་ཞིག་བྱེད། །
ཆོས་དང་ཟིང་ཟས་རྔམ་པའི་གྲོགས་པོ་དེ། །
བདུད་ཀྱི་ཆོ་འཕྲུལ་ཤེས་སམ་རྒྱལ་ཁམས་པ། །
བཟང་པོའི་གཏམ་ཞིག་ཐོས་ཀྱང་ཁོང་དུ་རྦས། །
མི་སྙན་གཏམ་ངན་སྣ་ཚོགས་འཁྱེར་འོངས་པའི།
ཅོལ་ཆུང་གཡོག་པོ་སེམས་ཁམས་དཀྲུག་པའི་རྒྱུ། །
ཤེས་ནས་རིང་དུ་འདོར་ཞིག་རྒྱལ་ཁམས་པ། །
རང་ཉིད་གཅིག་པུ་འཆི་བའི་དུས་ཀྱི་ཚེ། །
གཉེན་དང་འཁོར་གྱིས་སྐྱོབ་པར་མི་ནུས་པས། །
ཕྱི་མར་འགྲོས་རོགས་དམ་པའི་ལྷ་ཆོས་འདི། །
རྟག་ཏུ་ཡིད་ལ་མ་བརྗེད་རྒྱལ་ཁམས་པ། །
ཞེས་རང་སེམས་ལ་བསླབ་བྱ་མེ་ཏོག་ཕྲེང་མཛེས་འདི་གངས་རི་ཀརྨ་བསྟན་འཛིན་ཀུན་དགའ་ཆོས་ཀྱི་རྒྱལ་མཚན་གྱིས་ཕྱི་ལོ་༢༠༠༡༡་ཟླ་བ་༡༡་ཚེས་༢༣་ལ་དབྱེན་ལེན་གྱི་རྒྱལ་ས་ལོ་འགྲོན་དུ་བྲིས་སོ། །