འོད་གསལ་ཆོས་དབྱིངས་མེ་ལོང་ལ། །
འགྲོ་འོངས་བྱ་བྱེད་མེད་ན་ཡང་། །
སྟོང་གཟུགས་བཤེས་གཉེན་ཚུལ་བསྟེན་པའི། །
ཟླ་བ་གཉིས་སུ་མེད་ན་ཡང་། །
ཆུ་ནང་ཟླ་གཟུགས་སྣ་ཚོགས་ལྟར། །
ཆོས་དབྱིངས་གཉིས་སུ་མེད་ན་ཡང་། །
འགྲོ་དོན་སྤྲུལ་པ་སྣ་ཚོགས་མཛད། །
མ་དག་སྒྱུ་མའི་ཡུལ་འདི་ན། །
ཆོས་ཅན་མཐུན་སྣང་མེད་པའི་ཕྱིར། །
བླ་མ་སངས་རྒྱས་ཉིད་ལ་ཡང་། །
ཡོན་ཏན་སྐྱོན་དུ་མཐོང་བ་མང་། །
འགྲོ་ཀུན་དགའ་བའི་དབང་ཕྱུག་པའི། །
མཁན་ཆེན་རྡོ་རྗེ་འཆང་དབང་གི །
རྣམ་ཐར་གསེར་རིའི་ལྷུན་པོ་ལ། །
ཇི་བཞིན་འགྲེལ་པ་དཀའ་ན་ཡང་། །
དབུས་འགྱུར་ཞིང་ན་པཎྜི་ཏ། །
སྨིཏི་ཛྙྰ་ནའི་སྐྱེ་བ་བཞེས། །
གྲངས་མེད་དཀའ་བ་ཁྱད་བསད་ནས། །
བྷོ་ཊ་མུན་པའི་ཡུལ་དུ་བཞུད། །
མདོ་སྔགས་བསྟན་པ་ཉམ་གྱུར་པའི། །
དཔྱད་གསུམ་དག་པས་གསོ་བར་མཛད། །
ཆོས་འཁོར་བསྐོར་བའི་འོད་སྣང་གིས། །
འགྲོ་བ་མུན་པའི་ཡུལ་ལས་བསྒྲལ། །
མཐོ་སྒང་ནོར་འཛིན་ཐིག་ལེ་ན། །
རོང་སྟོན་ཤེས་བྱ་ཀུན་མཁྱེན་གྱི། །
སྐྱེ་བ་མངོན་པར་ཚུལ་བཞེས་ནས། །
ཆོས་སྡེ་ཆེན་མོ་ཕྱག་གིས་བཏབ། །
ཁྲི་ཕྲག་འདུས་པའི་དགེ་འདུན་ལ། །
བཤད་སྒྲུབ་འཁོར་ལོ་གསུམ་གྱི་ཆོས། །
བསྐོར་བའི་དེད་དཔོན་ཆེན་པོ་ཡིས། །
འགྲོང་མང་ཐར་པའི་གླིང་དུ་འདྲེན། །
བསྟན་པ་ནུབ་ལ་འགྲིབ་ཉེ་བའི། །
ལྔ་བདོ་དུས་ཀྱི་མཐའ་མ་འདིར། །
ད་དུང་ཐུགས་ཀྱིས་མ་བཟོད་ནས། །
སླར་ཡང་ལན་གཅིག་ཚུལ་དུ་བྱོན། །
མདོ་སྲིབ་ས་ཡི་རྨད་ལྗོངས་ན། །
ཡུམ་ཆེན་སྦྲུམ་པའི་གེ་སར་ལས། །
གཞོན་ནུ་ཟླ་མེད་ཟེའུ་འབྲུ་ཞིག །
གདུལ་བྱའི་དོན་དུ་མངོན་པར་བཞད། །
འཁོར་བ་སྡུག་གི་བཙོན་ར་ལ། །
ངེས་འབྱུང་དྲག་པོ་ཉིད་སྐྱེས་ཏེ། །
ཁྱིམ་གཞིས་དོར་ནས་མྱུར་མོར་བྲོས། །
རྫོང་སར་བཤད་གྲྭའི་ཆོས་སྒོར་ཞུགས། །
ཕྱི་རུ་རབ་བྱུང་གོས་རྟགས་རྒྱན། །
ནང་དུ་སྡོམ་གསུམ་གཙང་མ་འཛིན། །
ཐུགས་ལ་བརྩོན་འགྲུས་གོ་ཁྲབ་གྱོན། །
ཤེས་རབ་རལ་གྲི་གཞུང་ལ་འཕྱར། །
ཉིན་མཚན་དབྱེར་མེད་ཐོས་རྩོད་ཀྱིས། །
དཀའ་བ་བརྒྱ་ཕྲག་དང་དུ་བླངས། །
གཞུང་བརྒྱ་མ་ལུས་ཁོང་ཆུད་པས། །
མཁན་པོའི་མཚན་གྱི་ཅོན་པན་བཞེས། །
ཚུལ་གསུམ་རིག་པའི་མདའ་མོ་ཡིས། །
ཕས་རྒོལ་དམ་བཅའ་ཐོ་ཡོར་འབིག །
མཁས་སྙན་ཆོས་དུང་སྒྲ་དབྱངས་ཤིག །
སུས་ཀྱང་མ་བུས་རང་གྲགས་གྱུར། །
ཀླ་ཀློག་གུང་ཁྲན་ཇག་དམག་གིས། །
ཆོས་སྡེ་དམག་གི་ཆག་ར་བཟུང་། །
སངས་རྒྱས་བསྟན་པ་ནུབ་ལ་སྐྱེལ། །
གངས་ཆུ་ཁྲག་ཏུ་བསྒྱུར་བའི་ཚེ། །
ཁྱོད་སྐུར་ལྕགས་སྒྲོག་བཅིང་ན་ཡང་། །
ཁྱོད་སེམས་སུ་ཡིས་བཅིང་དཀའ་བས། །
ཉམས་ལེན་རྟོགས་པའི་བསྟན་པ་ནི། །
ནམ་ཡང་མི་འདོར་གཅེས་པར་མཛད། །
ཤྰཀྱའི་རྒྱལ་པོའི་བསྟན་པ་འདི། །
དབུས་འགྱུར་ཞིང་ནས་མེ་རོ་ཞིག །
གསོ་བའི་བགོ་སྐལ་ཉེར་མཐོང་སྟེ། །
ཐུགས་ཀྱི་དགོངས་པ་ཕྱོགས་སུ་བསྟན། །
འཛམ་གླིང་ཡངས་པའི་རྩེ་མོ་ནས། །
རྐང་གཉིས་མི་ཡི་སེངྒེ་ཁྱོད། །
མི་རྟག་སྐུ་ལུས་བགྲེས་ན་ཡང་། །
འཁར་བའི་རོགས་ལ་བརྟེན་བཞིན་དུ། །
རྐང་ལམ་ཕྲ་མོ་རེ་རེ་ནས། །
ས་འཛིན་རྒོད་པོར་གོམ་ཁ་བསྒྱུར། །
རྡུལ་ཆུ་ནག་པོས་རི་མོ་སྟོན། །
ལྟོགས་སྐོམ་ངལ་བ་དང་དུ་བླངས། །
དཀའ་བའི་ལས་ལ་མིན་འཛིན་པ། །
ཚ་བའི་རོང་དུ་བྱོན་ན་ཡང་། །
ཀུན་གྱི་སེངྒེ་མི་ཤེས་པས། །
གྲོང་གི་གཅན་གཟན་གྲས་སུ་རྩིས། །
ཡོན་ཏན་གཡུ་ཡི་རལ་བ་དེ། །
མིག་མི་འཛུམ་གྱིས་ལེགས་མཐོང་བས། །
འདི་ནི་གདོང་ལྔའི་དབང་པོ་ཞེས། །
གཟེངས་བསྟོད་ཆེན་པོས་གོང་དུ་བཀུར། །
སེང་གེ་དཔའ་ང་ཆེན་ན་ཡང་། །
ཕག་སྤྱང་ཁྱུ་ཡིས་བསྐོར་ན་དཀའ། །
མཁས་པ་ཇི་ལྟར་མཛེས་ན་ཡང་། །
བླུན་པོའི་ཁྲོད་དུ་མཛེས་པར་དཀའ། །
ཧི་མ་ལ་ཡི་རི་རྒྱུད་ན། །
དགོན་ཆུང་ཕག་ཕུག་ཙམ་ཞིག་ནང་། །
བཤད་སྒྲུབ་བསྟན་པའི་མེ་རོ་གསོས། །
དེ་ཚེ་དཀའ་བ་དཔག་མེད་སྤྱད། །
སྙུང་གཞི་ཇི་ལྟར་ལྩི་ན་ཡང་། །
ཆོས་འཆད་སྲོག་ལས་གཅེས་པར་མཛད། །
སུ་དང་གང་ལ་མི་གཅེས་པ། །
འཆད་རྩོད་རྩོམ་གསུམ་ཁོ་ན་གཅེས། །
རིང་ལུགས་ནགས་ཚལ་མཛེས་པའི་རྒྱན། །
དམར་ཡག་སྟག་ཁྱོད་སུ་ཡིས་འགྲན། །
རྩོད་དུས་སྣང་གཡེང་དུས་འདི་ལ། །
སྐྱེས་མཆོག་ཁྱོད་འདྲ་ཡོང་སྲིད་དམ། །
མགོན་པོ་དུས་ཀྱི་ཕོ་ཉ་ཡིས། །
མན་ངག་གླུ་དབྱངས་སྒྲོག་ཐེངས་རེས། །
གདུལ་བྱ་དཔྱིད་ཀྱི་གདུང་སེལ་ནས། །
རིག་པའི་དབྱར་གྱི་དགའ་སྟོན་སྦྱིན། །
ཤེས་བྱའི་རྩྭ་ཐང་ཡངས་པོ་རུ། །
ཆོས་ཉིད་ཕང་ཕུག་མེ་ཏོག་ལ། །
ལྟ་བའི་ཤེས་རབ་མིག་བྱིན་པའི། །
བཀའ་དྲིན་གསོས་པའི་དུས་སྲིད་དམ། །
བསླབ་གསུམ་ལུང་རྟོགས་ནང་ནས་སྐྱོང་། །
འཚོ་གོས་ཟས་གསུམ་ཕྱི་ནས་སྐྱོང་། །
ཕྱི་ནང་གཉིས་ལ་དྲིན་ཆེ་བའི། །
ཡབ་རྗེ་དཀའ་དྲིན་ཇི་ལྟར་གསོ། །
ཐང་ཆེན་གཡུ་ཡི་མཎྜལ་སྟེང་། །
སྤྲིན་དཀར་འདབ་མ་འཁྱིལ་འདྲ་བའི། །
མཐོང་བ་ཀུན་སྨོན་བཤད་གྲྭ་དེ། །
གང་གིས་བཏབ་པའི་ཆོས་སྡེ་ཡིན། །
རྒྱབ་རི་ཤེས་གྱི་མཆོད་རྟེན་ལ། །
ལྗོན་ཤིང་སྣ་ཚོགས་བརྒྱན་པ་ནི། །
གྲུབ་དབང་ཁྲོ་བོ་སྟག་འདྲ་བ། །
རྒྱུན་མེད་ཆད་པ་འབྱུང་བའི་རྟགས། །
མདུན་རི་གསེར་ཉ་འགྱེལ་འདྲ་བ། །
དགེ་འདུན་མཚོ་མོ་རྒྱས་པའི་དབུས། །
འཆད་རྩོད་རླབས་ཕྲེང་རྩེན་པའི་ཁྲོད། །
མཁས་པ་གསེར་ཉ་འབྱུང་བའི་རྟགས། །
ཐུགས་བསྐྱེད་རྒྱ་མཚོ་ཆེན་པོ་ཡིས། །
འཕྲིན་ལས་རླབས་ཆེན་འཕྱུར་པ་ལས། །
འཇིག་རྟེན་གྲུ་བོའི་གར་སྟེགས་ན། །
འདོད་འཇོའི་བུམ་བཟང་འདི་ཉིད་བརྡོལ། །
བཤད་སྒྲུབ་བསྟན་པའི་འགྱུར་ཁུགས་ནས། །
ཞུམ་མེད་ལྷག་བསམ་དཔུང་སྟོབས་ཀྱིས། །
བསྟན་པའི་བ་དན་དཀར་པོ་འདི། །
སྲིད་རྩེ་བར་དུ་བསྒྲེང་བར་མཛད། །
ངེས་པར་དོན་གྱི་བླ་ཆེན་ཞེས། །
མགྲིན་པས་གཟེངས་སུ་བསྟོད་པ་ན། །
ཁྱོད་མིན་སུ་ཞིག་སྨྲ་བ་ནུས། །
སྨྲས་ན་བླུན་པོས་རང་མཚང་བརྡོལ། །
སྐུ་ལུས་ཐེངས་མང་གཤགས་ཀྱང་རུང། །
སྐྱོ་ཞེན་ནམ་ཡང་མི་མངའ་བ། །
བསྟན་པའི་བྱ་བ་ཁོ་ན་སྤེལ། །
དགྲ་བཅོམ་ཆེན་པོ་ཁྱོད་མིན་སུ། །
མཁས་ཆེན་སྨྲ་བའི་སེངྒེ་ཁྱོད། །
འཇིག་རྟེན་འདི་ན་བཞུགས་པའི་ཚེ། །
བསྟན་པ་གངས་དཀར་རི་བོ་ལ། །
ལྟ་བའི་མིག་གི་རྒྱན་གཅིག་ཡིན། །
རྟག་འཛིན་ཅན་གྱི་གདུལ་བྱ་ལ། །
མི་རྟག་འགྱུར་བའི་ཚུལ་བསྟན་ནས། །
མགོན་ཁྱོད་ཞིང་གཞན་གཤེགས་གྱུར་པས། །
བསྟན་པའི་སྒྲོན་མེ་སུ་ཡིས་སྦར། །
སྐྱེས་མཆོག་ཁྱོད་ཀྱི་ཞལ་སྔ་ནས། །
ཐོས་རྩོད་བརྙེས་པའི་བགོ་སྐལ་ལ། །
བསམ་བཞིན་དད་པའི་སྤུ་ལོང་ངང་། །
སྐྱོ་བའི་མཆི་མ་སེམས་ལ་ལྷུང་། །
ཀྱེ་མ་མཁན་ཆེན་རྡོ་རྗེ་འཆང་། །
མགོན་ཁྱོད་ད་ལྟ་གང་དུ་བཞུགས། །
ཁྱེད་ཀྱི་སླབ་བྱའི་གསུང་སྙན་དང་། །
དགྱེས་པའི་མཛུམ་མདངས་མཇལ་ན་བསམ། །
སེམས་ཞུམ་ངལ་བ་འཕྲད་པའི་དུས། །
མགོན་ཁྱོད་སྙིང་སྟོབས་དྲན་ཐེངས་རེས། །
ངལ་བ་སངས་ནས་མདུན་ལམ་དུ། །
འདྲེན་པའི་དེད་དཔོན་གཅིག་པུ་ཡིན། །
ཇི་སྲིད་སངས་རྒྱས་མ་ཐོབ་བར། །
ཐུགས་བསྐྱེད་སྨོན་ལམ་མི་འདོར་བ། །
ཕ་བུ་འབྲེལ་མེད་ལྷན་གཅིག་ཏུ། །
དམ་ཆོས་བདུད་རྩིར་རོལ་བའི་ཕྱིར། །
སྨོན་པའི་དོན་ཀུན་འགྲུབ་གྱུར་ཅིག །
ཅེས་མཁན་ཆེན་རྡོ་རྗེ་འཆང་ཀུན་དགའ་དབང་ཕྱུག་མཆོག་གི་ཞབས་བརྡུ་ཅུང་ཟད་རེག་པའི་སྐལ་ལྡན་གྱི་ལས་འཕྲོ་ཅན་གངས་རི་ཀརྨ་སྟན་འཛིན་ཀུན་དགའ་ཆོས་ཀྱི་རྒྱལ་མཚན་གྱིས་བླ་མའི་ཡོན་ཏན་ཟུར་ཙམ་བླངས་པའི་རྟོགས་བརྗོད་སྦྲང་རྩིའི་ཐིག་པ་འདི་ནི་དབྱེན་ལེན་དུ་བྲིས་སོ། །དྲིན་ཆེན་བླ་མ་དགྱེས་པའི་རྒྱུར་གྱུར་ཅིག །