འགྲོ་མགོན་རིན་ཆེན་གྱི་རྣམ་ཐར་གཅེས་བསྡུས།




                                                          རྗེ་འགྲོ་མགོན་རིན་ཆེན་ལ་ན་མོ། །
རྗེ་འགྲོ་མགོན་རིན་ཆེན་ནི་ཕྱི་ལོ་༡༡༧༠་ལྕགས་སྟག་དབྱར་ཟླ་དང་པོ་ཚེས་༡༠་ལ་སྨར་ཁམས་སྟག་ར་རིན་ལྡན་ཚང་ཁྱིམ་དུ་ཡབ་ནོར་བཟང་ལྷ་རྒྱས་དང་ཡུམ་པདྨ་ཆོས་མོ་གཉིས་ལས་སྐུ་འཁྲུངས། བྱིས་དུས་རས་ཆུང་པའི་སྐྱེ་བ་ཡིན་པར་དྲན། དགུང་ལོ་བཅུ་གསུམ་ལ་གསེར་ཏོག་དགོན་དུ་ཞུགས་ནས་དགེ་བཤེས་ཡེ་ཤེས་འོད་ཟེར་དང་། དར་མ་རིན་ཆེན་ལས་རབ་ཏུ་བྱུང་། མཚན་རིན་ཆེན་ནོར་བུ་གསོལ།  བླ་མ་དེ་གཉིས་ལས་མདོ་གཞུང་དང་གསོ་སྨན་སོགས་ལ་བྱང་ཆུབ་པར་མཛད།

དགུང་ལོ་ཉི་ཤུ་ལ་གསང་ཕུ་ནེའུ་ཐང་དུ་ཕེབས་ནས་ཕྱྭ་བ་ཆོས་སེང་།  གླན་རྒྱལ་བ་སོགས་ལས་ཆོས་ཚུལ་འགའ་གསན།  འཇིག་རྟེན་མགོན་པོ་དང་དུས་མཁྱེན། ཤཱཀྱ་ཡེ་ཤེས་སོགས་ལས་བསྙེན་པར་རྫོགས།  བླ་མ་དེ་དག་ལས་གསང་སྔགས་ཀྱི་ཆོས་མང་པོ་གསན།  ཉི་མ་འོད་ཟེར་གྱིས་ལུང་བསྟན་ལྟར་སྨར་པའི་ཞབས་ལ་གཏུགས་ནས་ཕྱག་ཆེན་སོགས་བཀའ་བརྒྱུད་ཀྱི་གདམས་ངག་རྣམས་ལ་གསན་བསམ་སྒོམ་གསུམ་བྱས་པས་ཕྱག་ཆེན་གྱི་ལྟ་བ་རྟོགས།  ཡི་དམ་ལྷས་ཞལ་གཟིགས།  ཕྱི་ལོ་༡༢༠༠་ལོར་ཙོམ་མདོ་གནས་གསར་དགོན་པ་ཕྱག་བཏབ།  ཐོག་མ་དགེ་འདུན་གཅིག་སྟོང་གསུམ་བརྒྱ་ལ་འཆད་ཉན་སྤེལ།  ནང་རྟེན་སྟོན་པ་ལི་ཁྲི་ལས་གྲུབ་པ་ཐོག་ཚད་མ། སྒྲོལ་མ།  འཇམ་ཕྱག་སྤྱན་གསུམ། གུ་རུ་སྣང་སྲིད་ཟིལ་གནོན།  ལྷ་འདུས་ཉམས་གསོ།  ཆོས་རྗེ་སྨར་པའི་གསེར་གདུང་མཆོད་རྟེན་ཐོག་ཚད་མ།   བཀའ་འགྱུར་གསེར་བྲིས་དང་དངུལ་བྲིས།  སྨར་པའི་གསུང་འབུམ་ཤིང་སྤར་བརྐོས་པ་སོགས་རྟེན་བཞེངས་རྒྱ་ཆེར་མཛད། ཡང་དགོན་པ་རྒྱལ་ཚབ་བསྐོས། བྲ ག་འགོ་དགོན་དང་རྒྱ་གཉེན་དགོན་བཏབ།  ཙོང་ཤོད་ཀྱི་གནས་སྒོ་ཕྱེ། བྱང་ཆུབ་དགོན་དང་འབུམ་དགོན་བཏབ། གསེར་ཏོག་དགོན་དུ་དར་མ་རིན་ཆེན་དང་།  ཡེ་ཤེས་འོད་ཟེར་གཉིས་ཀྱི་གདུང་རྟེན་བཞེངས།   སྟག་ར་ལ་འབྲུམ་ནད་བྱུང་བས་སྨན་སྦྱིན་གྱིས་གྲོལ་བར་མཛད། ཁྱུ ང་འབུམ་དུ་རྫོང་འགོ་དགོན། བུམ་རྭ་དགོན།  ཡངས་རི་དགོན། ཧ་ཆེ་དགོན་བཅས་བཏབ། ཝ་དུང་དགོན།  ནམ་མཁའ་བཀྲ་ཤིས།  ལོ་སྨད་དགོན། རོང་དགོན། ཀོལ་ཁྲོམ་དགོན།   འདོར་བཟང་དགོན་སོགས་བཞེངས། ས་ཐང་ལ་སུ་རི་དགོན།  འཇང་དོན་འགྲུབ་དགོན་སོགས་སྐུ་ཚེ་གཅིག་ལ་དགོན་ལག་བདུན་ཅུ་དོན་གཅིག་བཏབ། ས་པཎ་ཁུ་ཚ་གཉིས་བསུ་སྐྱེལ་དང་།  བཀའ་འགྱུར་གསེར་བྲིས་བརྒྱ་དང་བརྒྱད་བཞེངས་ནས་དགོན་ལག་རྣམས་ལ་མཆོད་རྟེན་དུ་བསྩལ།  ཕྱི་ལོ་༡༢༤༩་དབྱར་ཟླ་༧་ཚེས་༡༥་ལ་སྐྱེ་སྤྲུལ་བཅུ་དྲུག་གི་བར་སྨར་ཚང་བསྟན་པའི་མེ་རོ་གསོ་བར་ལུང་བསྟན་ནས་བདེ་བར་གཤེགས།   བུ་སློབ་རྟོགས་ལྡན་བྲག་ཀ་བ། གཡུ་རལ་གྲུབ་ཐོབ།   གྲུབ་ཐོབ་ཐང་གཏོང་བ།  སྟོན་པ་ཚུལ་ཁྲིམས་གཞོན་ནུ། ཀརྨ་སེངྒེ་།  ཉི་མ་སེངྒེ་། སྟག་གཡག་དཔལ་ལྡན། ནམ་མཁའ་བཟང་པོ།  ཡེ་ཤེས་དབང་ཕྱུག་སོགས་མང་དུ་བྱོན།
རྣམ་ཐར་འདིའི་བདག་དབང་སྨར་ཚང་བཀའ་བརྒྱུད་རྒྱལ་ཡོངས་ལས་ཁུངས་ལ་ཡོད་པས་ཆོག་མཆན་མེད་པར་ཕབ་ཤུལ་མི་ཆོག་པར་མཛོད། །

 
 
 

༄༅།། སྨར་ཚང་བསྟན་རྒྱས་སྨོན་ལམ།

ཨོཾ་སྭ་སྟི། །བསྟན་པ་གངས་རིར་སྲི་ཞུའི་ཆུ་རྒྱུན་གྱིས། །ཚོགས་གཉིས་རྨད་བྱུང་ཡོན་ཏན་པདྨོ་ལ། །འཕྲིན་ལས་འདབ་རྒྱས་ལམ་བཟང་འཛུམ་བཞད་ནས། །སྐལ་བཟང་བདེ་སྟོང་སྦྲང་རྩིར་རོལ་གྱུར་ཅིག །གཟུང་འཛིན་རྦ་རླབས་བྱིང་རྒོད་འཕྱུར་བ་ཀུན། །གཡོ་མེད་སེམས་མཆོག་ཆུ་བོ་གཅིག་བསྒྲིལ་ཏེ། །ཞི་ལྷག་རྒྱ་མཚོ་ངང་ཚུལ་བསྟེན་བྱེད་ནས། །སྐུ་བཞི་བརྙེས་མཛད་སྨར་ཚང་རྒྱས་གྱུར་ཅིག །མཁས་མང་རྒྱ་མཚོ་རྟོགས་ལྡན་ངང་པའི་ཁྱུ། །སྒོམ་ལྔའི་སྒྲོ་རྒྱས་སྟོང་ཉིད་རླུང་ཤུགས་ཀྱི། །ཡེ་ཤེས་ལྔ་ཡི་མཁའ་ལ་ལྡིང་བྱེད་པའི། །སྨར་ཚང་བཤད་སྒྲུབ་འཛམ་གླིང་ཁྱབ་གྱུར་ཅིག །ཤོ་ཙོམ་ཉི་ཟླ་མུན་སེལ་ཟུང་གཅིག་སྲོལ། །དུས་ཀྱི་དབང་གིས་ནུབ་ཏུ་གཤེགས་གྱུར་ཀྱང་། །སླར་གསོ་འདུན་སྡེ་སྐྱ་རེངས་མྱུར་ཤར་ནས། །མཁས་གྲུབ་ཉིན་བྱེད་རིང་ལུགས་གསལ་གྱུར་ཅིག །ཡེ་ཤེས་སྤྱན་ལྡན་སྨར་ཚང་ཆོས་སྲུང་ཀུན། །གཡེང་དུས་ལས་བཞེངས་བསྟན་དགྲ་ཚར་གཅོད་ནས། །བསྟན་འཛིན་སྦྱིན་བདག་མངའ་ཐང་མྱུར་རྒྱས་ཏེ། །བཀྲ་ཤིས་སྙན་གྲགས་སྲིད་གསུམ་ཁྱབ་པར་མཛོད། ཅེས་སྨར་ཚང་བསྟན་རྒྱས་སྨོན་ལམ་འདི་གངས་རི་ཀརྨ་ཆོས་ཀྱི་རྒྱལ་མཚན་གྱིས་ཕྱི་ལོ་༢༠༠༩་ཕྱི་ཟླ་༦་ཚེས་༢༣་དབྱིན་ལེན་གྱི་རྦུ་རེ་ཐིན་དུ་བྲིས་སོ།