ཨོཾ་སྭ་སྟི། །
སྤྲུལ་སྐུ་གསུམ་པོ་ཞབས་ཀྱིས་བཅག །
སྦྱངས་སྟོབས་འབྲས་བུ་སྨིན་པའི་གཞི། །
རྟོགས་ལྡན་གྲངས་མེད་བཞུགས་པའི་གནས། །
བཀའ་བརྒྱུད་བླ་མར་ཕྱག་འཚལ་ལོ། །
བདེ་བའི་འབྱུང་གནས་ཕག་མོ་གྲུར། །
རང་སེམས་གཉིས་སུ་མེད་པར་མཇལ། །
གསུངས་པ་ཙམ་གྱིས་བྱིན་རླབས་ཞུགས། །
བདེ་སྟོང་ཉམས་ཀྱིས་ལུས་སེམས་རྒྱས། །
ཁོ་བོས་སྐྱེ་བ་སྔ་མ་ཡང་། །
ཁྱོད་ཀྱི་བླ་མ་བགྱིས་པ་དང་། །
གསང་སྔགས་ཟབ་མོས་སྐྱོང་བའི་རྟགས། །
ཡིན་ཞེས་བདག་ལ་བཀའ་ལུང་སྩལ། །
ཆོས་ཚིག་གཅིག་ཀྱང་མ་བསྟན་པར། །
སེམས་ལ་བྱིན་རླབས་མཁའ་དང་མཉམ། །
གཉུག་མ་རང་ངོ་རང་གིས་ཤེས། །
སེམས་ཉིད་སྐྱེ་འགག་མེད་པར་མཐོང་། །
ནམ་མཁའ་ལྟ་བུའི་རང་སེམས་དེ། །
མཐར་ཐུགས་ཆོས་སྐུར་ངོ་སྤྲོད་མཛད། །
བླ་མ་བདེ་གཤེགས་རིན་པོ་ཆེས། །
ཞལ་ནས་བདག་ལ་འདི་སྐད་གསུངས། །
མོས་གུས་རིན་ཆེན་སྣོད་ལྡན་ལ། །
བཀའ་བརྒྱུད་བྱིན་རླབས་ཞུགས་པ་ཡིན། །
ལས་ཅན་ནམ་མཁའ་དྭངས་མ་ལ། །
གཉིས་མེད་རྟོགས་པའི་ཉི་མ་ཤར། །
སྐྱེས་བུ་དམ་པ་དགའ་བར་གྱིས། །
འཁོར་འདས་གཉིས་ཀྱི་ཤན་ཕྲག་ཕྱེད། །
མཐའ་དང་བྲལ་བའི་དབུ་མ་དེ། །
ཁྱོད་ཀྱིས་ད་གཟོད་གོ་ཞེས་གསུངས། །
ངོ་སྤྲོད་གཉིས་པ་འདི་ལྟར་མཛད། །
ཆོས་རྣམས་ཀུན་གྱི་ཆོས་ཉིད་དེ། །
ཀུན་ཏུ་གྲོལ་བའི་ཚུལ་དུ་ཡང་། །
འདམ་བུ་ཤིང་གི་དཔེ་ཡིས་བསྟན། །
བླ་མའི་བྱིན་རླབས་གསེར་འགྱུར་རྩིས། །
ཐ་མལ་ཤེས་པ་ཆོས་སྐུར་བསྒྱུར། །
ཉིན་མཚན་རྒྱུན་པར་འོད་གསལ་ངང་། །
དྲན་སྣང་ཟུང་འཇུག་ངོ་བོར་རྟོགས། །
ལམ་གྱི་སྐུ་གསུམ་ཉམས་སུ་མྱོངས། །
འབྲས་བུ་སྐུ་གསུམ་བློ་ལས་འདས། །
འཆི་བར་མི་འཇིགས་གདེང་ཞིག་ཡོད། །
བར་དོར་འཁྲུལ་བའི་དོགས་མ་མཆིས། །
མདངས་ལྡན་སྙིང་པོའི་མེ་ཏོག་རྒྱན། །
མི་འཁྲུགས་རྒྱལ་པོའི་ཞིང་ཁམས་དེར། །
འདྲེན་པ་བློ་གྲོས་དྲི་མེད་དང་། །
སྤྲུལ་སྐུ་ཡབ་སྲས་མཇལ་བར་ངེས། །
བཀའ་དྲིན་ཅན་གྱི་བླ་མ་ལ། །
སྒྲུབ་པའི་བསྙེན་བཀུར་མ་ནུས་ཀྱང་། །
མོས་གུས་ལྷུན་གྲུབ་ཆུ་རྒྱུན་བཞིན། །
ཉིན་མཚན་སྤྱོད་ལམ་ཐམས་ཅད་དུ། །
སྣང་སེམས་ཟུང་འཇུག་རྟོགས་པ་བསྐྱངས། །
ཁ་ལྟ་རྐྱང་པར་མ་སོང་ཙམ། །
བླ་མས་ཅི་གསུངས་བགྱིས་ལགས་པས། །
བན་སྤྲང་གི་འདུག་མ་རྩེ་མར་སོང་། །
སྤྲུལ་སྐུ་བླ་མ་རིན་པོ་ཆེ་ཕག་མོ་གྲུ་པ་ལ་བན་སྤྲང་ཤེས་རབ་ཡེ་ཤེས་ཀྱི་མཇལ་ལུགས་ལགས་སོ། །