གདན་ས་འདི་ཐོག་མ་གཞུང་ཆེན་པོ་ལ་ཐོས་བསམ་རྩོད་གསུམ་གྲུབ་པ་དང་སྨར་ཚང་ཕྱག་ཆེན་སོགས་སྒོམ་སྒྲུབ་ཉམས་ལེན་མཛད་སྲོལ་དར། ཕྱི་ལོ་༡༢༠༠་ལོར་འགྲོ་མགོན་རིན་ཆེན་གྱིས་སྨར་ཁམས་རུ་ཤོད་ལ་ཙོམ་མདོ་གནས་གསར་དགོན་པ་བཏབ་པས། དགེ་འདུན་སྟོང་ཕྱེད་གཉིས་ནས་རིམ་བཞིན་ཁྲི་ལ་ཉེ་བར་བྱུང་། སྨར་ཚང་བཀའ་བརྒྱུད་ཀྱི་ཁྱད་ཆོས་ནི་བཤད་སྒྲུབ་སྒོམ་གསུམ། ཉམས་ལེན་གནས་བཞི། ཆོས་སྐྱོང་རྣམ་གསུམ་ཞེས་གྲགས། གསང་ཕུལ་ནེའུ་ཐང་གི་ལུགས་ལྟར་མདོ་གཞུང་ལ་ཐོས་བསམ་རྩོད་གསུམ་བྱས་པ། ཡི་དམ་བདེ་དགྱེས་གསང་གསུམ། འཇམ་ཕྱག་སྤྱན་གསུམ། སྨན་བླ། སྒྲོལ་མ་བཅས་ལ་མཚམས་བསྙེན་སྒྲུབ་བྱས་པ། སྨར་ཚང་ཕྱག་ཆེན་དང་ཆོས་དྲུག་གི་མན་ངག་རྣམས་དབང་པོ་རབ་འབྲིང་ཐ་གསུམ་གྱི་བློ་དང་མཐུན་པ་རྩེ་གཅིག་ཏུ་སྒོམ་པ་ལ་བཤད་སྒྲུབ་སྒོམ་གསུམ་ཡིན། རྩེ་གཅིག་པ། རོལ་པ་གཅིག་པ། སྤྲོས་བྲལ། སྒོམ་མེད་བཅས་ལ་རྣལ་འབྱོར་བཞི་ཡིན། མགོན་པོ་བྱ་རོག་གདོང་ཅན། དུད་སོལ་མ། མགོན་དཀར་བཅས་ཡིན། ཤོ་ཙོམ་གཉིས་གྱི་དགོན་ལག་ནི་སྨར་ཁམས་དང་། ཉག་བྲེ། གོ་འཇོ། སྡེ་དགེ ལི་ཐང་། མི་ཉག ཁ་བ་དཀར་པོ། འཇང་ཐང་། རྒྱལ་ཐང་། ས་ཐང་། རྒྱ་ནག་རི་པོ་རྩེ་ལྔ། ཀོང་པོ། གནས་ཙྭ་རི། སྟོད་མངའ་རི་སོགས་དར་བས་ཤོ་ཙོམ་ཉི་ཟླ་ཟུང་གཅིག་ཅེས་སྙན་གྲགས་ཆེན་པོ་གྱུར། ས་པཎ་དང་ཆོས་རྒྱལ་འཕགས་པ་སོགས་བླ་ཆེན་རྣམས་འགྲོ་འོང་དུས་སུ་བཞུགས་གནས་གལ་ཆེན་ཞིག་བྱས་སྲོལ་དར། ཕྱི་ལོ་༡༦༣༩་ལོ་སྲོག་དམག་གིས་དགོན་སྡེ་མང་པོ་གཏོར་བཤིག་ཁྲོད་སྨར་ཚང་གི་དགོན་མ་ལག་དང་བཅས་པར་གྱོང་གུད་ཆེན་པོ་གྱུར། བོད་རྒྱ་ཚིག་མཛོད་སྨད་ཆ་ཤོག་གྲངས་༢༡༦༩་ལ་སྨར་ཚང་ཤེས་རབ་སེངྒེ་། སྨར་པ་བཀའ་བརྒྱུད་སྲོལ་བཏོད་པོ་ཡིན། ཕྱིས་སུ་ལུགས་དེ་ཁམས་དཔལ་ཡུལ་གྱི་རྙིང་མ་པ་དང་གཅིག་ཏུ་དྲིལ་ནས་དེའི་བླ་མ་རྣམས་ལ་ཀརྨ་པའི་ཡང་སྲིད་ཟེར་བ་འདི་ཚིག་དོན་གཉིས་ཀ་ནོར་བ་ཡིན་ཏེ། སྨར་ཚང་ཕྱག་ཆེན་མན་ངག་རྒྱ་མཚོ་དང་རི་ཆོས་ཡོན་ཏན་ཀུན་འབྱུང་། ཆོས་དྲུག་གི་འགྲེལ་བ། སྔོན་འགྲོ་ཁྲིད་ཀྱི་འཆད་ཐབས་སོགས་ཕ་ཆོས་ཀྱི་སྲོག་ཤིང་། མན་ངག་གི་སྙིང་བཅུད། གདམས་ངག་གི་བདུད་རྩིའི་བརྒྱུད་པ་བཞུགས་ཡོད། དུས་རབས་འདི་རིག་གཞུང་ཉམས་པ་སླར་གསོའི་དུས་ལ་བསྟུན་ནས་ཆོས་བརྒྱུད་འདིས་ཀྱང་ཉམས་པ་སླར་གསོ་ཆེད་སྨར་ཚང་སྲི་ཞུ་ཚོགས་པས་ལས་དོན་སྒྲུབ་བཞིན་པ་ཡིན། །
ལོ་རྒྱུས་འདིའི་བདག་དབང་སྨར་ཚང་བཀའ་བརྒྱུད་རྒྱལ་ཡོངས་ལས་ཁུངས་ལ་ཡོད་པས་ཆོག་མཆན་མེད་པར་ཕབ་ཤུལ་མི་ཆོག་པར་ཞུ། །
